★دايِن تُدان★
ليه يازمان بقت كدا
ليه الحياة بالشكل دا
يا دنيا ليه فيكي العِبَر
الناس قلوبها صبحت حَجر
ليه...ليه...ليه كل دا
معقولة يوصل بينا الحال..!!!
مشرفة مأجورة... قمة إهمال...!!!
يعذبوا جده بدخول حَمام ...!!!
يبكوها... ويهينوها... دا الإهتمام...!؟
شئ فظيع... فوق الإحتمال...!!!
ليه...ليه...ليه كل دا
وإنت ياباشا فين غفلان
عن أمك...وسايبها تتهان
بعد تعبها معاك طول عُمرك
كان كل همها... تَلبيِّة أمرك
لاجل تكون أحسن إنسان
أخرتها مش قادر ع المدام
ماهي راكبه... وشده اللجام
رَمِيت أمك بدار مسنين
ياخلق هُوه... فين الحنين
قولوا ع الدنيا....يالا السلام
ليه.... ليه...ليه كدا
الجدة أم ... تعبت ورَبِت
سهرت وخافت...
م النسمة خَبِت
جابتلكوا راجل...
صانكم ف بيته
تترسموا به...
وكمان بِصِيتُه
عمرها ما كِرهِت...
بالعكس حَبِت
ليه...ليه..ليه كل دا
قليلة الأصل بتهين حماتها
أما الأصيلة... تكرمها ف حياتها
كلمة حلوة وفعل كريم
مش حدف دبش... وسؤال لئيم
وكل واحدة صورة لعِيلِتها
ليه...ليه...ليه كل دا
يا مرات الإبن دايِن تُدان
راجعي نفسك...
ف اللي عدى واللي كان
صلحي من نفسك...
وكوني رحيمة
دا الأمر هَيِّن....
محتاج منك بس عزيمة
يلا إبدأي...
قبل ما يفوت الأوان
ليه...ليه...ليه كل دا
#هنائيات
#هناء_الغمري
ليست هناك تعليقات:
إرسال تعليق