المشهد بقى واضح جدا بشكل مخيف !!!
إعادة تمثيل قصة حب بوهم وتزييف !!!
ناس عايشة علشان غيرها ..
وناس عايزة اللى يشيلها ..
وناس ف حياتنا بعد تعودنا ..
بتروح زي سحابة الصيف !!!
خلينا نقول أن أحنا ،..
مكناش عارفين ..
مكناش فاهمين ..
مكناش حاسين ..
أزاى إتورطنا _ للدرجة دى _ ف بعض ؟!!!
أزاى مشوفناش نفسنا غير شهد ؟!!!
معرفناش أن أحنا هنكون ،..
ف عيون اللى حولينا دموع !!!
هندوق الشبع بطعم الجوع !!!
هنئن .. وكل ما فينا هيتألم بصوت مسموع !!!
هنبقى لغيرنا يدوب شركة و مشروع !!!
ملزمة !!! كام صفحة بيلخصوا الموضوع !!!
ضلوع جامدة وبس ضلوع !!!
علشان الروح هجرت ..
وسكنت ضلوع بشر تانية !!
ما بين الثانية والثانية .. أنا بشتاق ..
أنا يعنى .. مبتخيلش ما بينا فراق !!
كأنى معاك .. بتندهنى لما بتحتاجنى !!
بتعب .. فبميل رأسى ع كتفك ..
اللى مش موجود !!!
بحن .. بموت ..
ومن تانى تطمنى ،
تسكنى بلمسة ..
بنظرة و بكلمة ..
كأن ما في بينا حدود !!!
كأنك منى ومتغرب ..
وأتمنى أنى كنت أقرب ..
أجيلك .. وأخبط بابك ..
تضايفنى .. تجالسنى ..
زىّ زي أى غريب !!!
أمانة عليك ، متقولى بقى يا نصيب ..
مين لروح واحدة متقطعة ف جسمين ؟!!!
وليه بيجوا يسقونى ( المُر ) ..
وياخدوا منى ( السين ) ؟!!!
يجرحوا ف الجرح اللى لسه حزين ..
يشوفوا اللحظة وهى بتعدى عليا سنين ؟!!!
وليه ساكتين ؟!!! وليه راضين ؟!!!
وليه بندوب وبنبين أننا جامدين ؟!!!
وليه نصيبنا نتمسك ف ناس سايبين ؟!!!
#سمر_إسماعيل
#عشق_لا_ينتهى
ليست هناك تعليقات:
إرسال تعليق