( متحبنيش )
_ سمر أنا بحبك .
_ يعنى ايه ؟؟؟ تقصد ايه بالكلمة دى ؟؟؟ يعنى ايه بتحبنى دى ؟؟؟ مستغرب سؤالى !!!! أصل الحب اللى أنا بحبه مش زى الحب اللى بتحبه !!!!
بلاش السؤال ده !!! صعب مش كدة ؟!!!
أنت أزاى مصدقنى أصلا ؟؟؟
أنت متعرفش عنى حاجة … أى حاجة … ولا الهوا …
كل اللى فاكر أنك عارفة عنى ده أنا اللى عيزاك تعرفه .
دى الصورة اللى أنا عايزة أظهر بيها والقناع اللى بلبسه !!!
أنا أنسانة مزيفة .
جايب منين الثقة دى اللى بتتكلم بيها ؟؟؟
أنا مبحبنيش !!!!
عشان أنا فعلا متحبش .
لو أنت شايفنى جميلة ، ده من جمالك أنت ،
من جمال عينيك وقلبك ، بس أنا مش جميلة لأ !!!
أنا بظهر جميلة تمادياً فى إنكار نفسى وألامها ،
حتى نفسى مبتصعبش علىّ !!! متخيل قسوتى ؟؟؟
أنا مملة وكئيبة وسوداوية .
متحبش أبدااااااا أنا .
بتحب فىّ ايه ؟؟؟؟
تمثيلى لدور القوية ببراعة وأنا بموت ؟؟؟
أعتزازى بكونى أنا اللى بساعد وأسند وأدعم وأحسن وأقوى و ،… و ،… وأنا أبسط وأغلب خلق الله إن مكنتش أغلبهم على الأطلاق .
بتحب فىّ ايه ؟؟؟؟ وأزاى ؟؟؟؟ وليه ؟؟؟
أنا ضعيفة وجبانة ومهزومة … وكلى قهر وحزن .
كلى كسور و شروخ طبطبتك عليها هتعورك وأنا هزعل أنى جرحتك وهكره نفسى أكتر وأنا عذبتها وبعذبها كتير من كرهى ليها …
والله ما ناقصة أكرها زيادة بسببك …
أنا كلى أوجاع وجروح … مش هتشوفها … عشان مبحبش مشاعر العطف والشفقة .
بس هتظهر قدامك فى صورة تعب و توتر وعصبية وغباء وشدة أعصاب ونرفزة من غير داعى ودموع وصريخ من غير سبب … بس هو مش من غير سبب ؟؟؟
ده عشان أنت ضفطت _ غصب عنك _ على جرح أنت مش شايفه !!!
بتحب فىّ ايه ؟!!!
تفكيرى فى حاجات مش ليا ومش بتاعتى ؟؟؟
إحتياجى للحاجة وأدمانى ليها وجلد ذاتى أنى أبعد عنها ؟؟؟
طيب عايز منى ايه ببتحبنى دى ؟؟؟
عايز تألمنى وتوجعنى مش كدة ؟؟؟
عايز تقرب منى وتعودنى عليك وتعلقنى بيك ،
وأفضل أسهر وأفكر فيك وأحلم بيك لغاية ما أبقى بتنفس بوجودك فى حياتى وبعد كدة تسيبنى وتمشى صح ؟؟؟
أنا مستهلكة ومستنفزة وليا تصرفات وأوضاع غريبة لا تطاق ومفييش حيل ولا قوة ولا طاقة أعمل أى حاجة ؟؟؟
كتير ببقى عايزة حاجات وأقول العكس بقوة وجبروت تخليك تعمله وأنا مش عيزاه !!!!
عارف أنا مبقتش عارفة أنا عايزة ايه …
حتى كلامى ده أنا بقوله وأنا عارفة أنه هيخليك تضايق وتمشى وأنا مش عايزاك تبعد أنا محتجالك أنا فى أمس الحاجة لحد بيحبنى ، يتحملنى ويطمنى …
بس لو أنت عايز تبعد أتفضل أنا مش همنعك . أنا مبعرفش أمنع حد . حتى دى مبعرفش أعملها .
بالعكس دى أول حاجة أنا هطلبها منك وبإلحاح كمان لما القيك تعبان ومتضايق وأنا مش عارفة أخفف عنك .
هبقى بحبك وعيزاك بكل ما فىّ … وهقولك متحبنيش !!!!
#سمر_إسماعيل
#عشق_لا_ينتهى
ليست هناك تعليقات:
إرسال تعليق