بكره رسمته برموش عينيك
رسمت نخلة رسمت وردة
رسمت بيت
ولونته بالسعاده والأمل
السعاده لونت بيها أيامنا
والأمل لونت بيه مستقبلنا
وياريت أكون وفيت
رسمت بيت
وزينته بورد خدك بلون شفايفك
بسواد عينيك
وفي الأخر تهجر وتأسى
وكل دا عشان بحبك
عشان بحبك هجرت وأسيت
رسمت بيت
الشمس رسمتها فكرك وعقلك
والقمر رسمته شئ من جمالك
والنجم رسمته علو مكانك
ودلالك رسمته قبة البيت
رسمت بيت
وفرشته ليكِ بالوفا والحنان
اوعاك تقولِ حبِك عليّ هان
ازاي يهون! ياريت
رسمت بيت
غزلت قلبي من ورق الشجر
وقلبك نحتيه من حجر
رسمت قلبي طير أخضر جميل
جوه قفص من حديد
القفص دا هو قلبك والدليل
حبست قلبي والجناح قصيت
رسمت بيت
الربيع رسمته شجرة
والحب نسيم بيداعب ورقها
والفراشات على الزهور
عامله مظاهرة
ورافعه بالرقصات شعارها
أتيت يا ربيع أتيت
رسمت بيت
الليل رسمته وِحدة وعذاب وشوق
وبعدك رسمته دموع وجراح وشوك
الشوك رسمته فرشي
والشوق دا جوه قلبي
والدموع راسمها عيني
والدم رسمته جرحي
والسما راسمها سودا
فيها نجم واحد بعيد
هوَّ أنتِ
ولو قلبتي الورقة يا عمري
تلاقي ليل تاني رسمته
ليل جمعنا
رسمته فرحة
رسمته فستان ابيض وطرحة
والشربات رسمته دمك
والشموع حروف اسمي جنب اسمك
وكسوفك رسمته حنة
لما بس ألمح بكلمة
ألاقي خدودك بيها تتحنى
لما أقول كلمة بحبك
لما أقول هويت
رسمت بيت
الزمن رسمته بحر
وحبنا رسمته سفينة
والخصام رسمته موج عالي
بيرغمنا نرجع ما مشينا
وكل ما يغفل زمنَّا عنا
وتقرب تتلامس ايدينا
تخاصم وتبعد
ومش بعيد تكون نسيت
رسمت بيت
منايا أكمله وأكون معاك
ونتعاهد
يا حبيبي نكمل ما بنيت
رسمت بيت
د. إبراهيم مصري النهر
أشكركم
ردحذفخالص تحياتي