مش عارف من امتي وانا بعمل مجسمات الشيكولاتة ؟ من قبل ويلي وانكا او من بعده !
اول مرة مسكت شيكولاتة بالحجم الكبير كانت زي جرنال كبير طويل اسود مع صوابع طفل صغير حسيت انها ممكن تتحول أي حاجة ، لكنها كانت ناشغة وسودا زي لوني في المرايا تقريبا لكن الورق اللى حوليها جنني بيلمع وشفت عليه حتة من وشي .... من يومها حبيت الورق المفضض.. زمان كانت كل حاجة ببتباع في الورق المفضض اللى كانوا أحيانا بيسموه ورق الالمونيا ، او ورق الفضة
ماكنتش لوحدي بجمعه انا ومحسن ونادر وشوقي وحتي البت عطيات اللى أمها بتبيع الكرات والفجل على ناصية الحارة كلنا كانا بنجمعه وبنبدله مع بعض أحيان الورقة اللى بتبقي وشين وش دهبي والتانية فضي بتتبدل باتنين فضي ياتري عرفوا عن الحريقة ؟
محسن كان بيجمع اكتر لأنه ابن البقال وعلى طول بياخد حتة شيكولاتة من معظم الناس لما يشتروا من ابوه وخاصة مع منظر عنيه المشتاقة مع كل واحد بيفتح قدامه شيكولاتة .... دلوقت محسن اتنقل مكان تاني لكن لسه نظرة عينيه زي ماهي وهو بيقدم لأي حد أي خدمة لكنه ماساعدنيش ساعة الحريق رغم انه أمين شرطة ولسه زعلان منه .
نادر الله يرحمه مات زمان صغير مش فاكر الا صوته الحلو واخر مرة سمعته في إذاعة المدرسة كانت سورة يوسف كان صوته حلو وكل كلمة بترفرف داخلة جوا كل القلوب ... يومها اتكرم لأنه فاز في مسابقة القرآن بعدها ماظهرش تاني ياتري عملوا ايه بورق الشيكولاتة بتاعه . لو كان موجود يمكن ماكنش حصلت الحريقة أصلا.
شوقى حبيبي عشرة عمري اول واحد جمع معايا الورق من الشارع وكنا بنتخانق على حاجات كتير لكن ابدا مش مع بعض كنت بحس ان هو اخويا الوحيد رغم 11 اخ ليا لكن هو كان اخويا الوحيد ... هو فين دلوقت ما اعرفش خدته الغربة ولا الموت ؟ اخر مرة شوفته بيبص لي من بعيد بوش اصفر وهدوم جديدة ومادخلش أصلا الحارة.
محسن كان اشطرنا في لعب كل حاجة كرشه دلوقت اكبر من زمان على طول تشوفه من بعيد وهو بيلمع عربيته السودا الغالية تحس انه اتولد علشان يكون مدير عام او وزير لكن ماحدش عرف أصلا هو شغال فين ؟ وعلى طول كرشة بيكبر لكن برضه من ازاز العربية كنت بشوف ورق شيكولاتة كبير وماركات غريبة اول مرة اشوفها ، كل مرة فكرت اكسر أي حتة علشان أوصل لحتة من الورق الغريب لكن كنت بخاف منه ، فاكر لما حاولت زمان اخد منه حتة شيكولاتة وهو صرخ في وسط الناس لأ دي بتاعتي الكل بص عليه وطلعت اجري وكل الناس عينيها في ظهري سكاكين بتقطع في ومن يومها ماتكلمناش ولا مرة ، ممكن يكون هو السبب ف الحريقة ليه لأ ؟
عطيات او فوفه دلوقت بقيت نجمة سيما وبترقص ايه ؟ كانت جميلة وهي صغيرة ودايما الشيكولاتة بتجيلها هدية وأنواع كتيرة وكانت بتغظني انا بس علشان كانت بتلمح عنيا بتلمع مع ايدها البيضا وهي ماسكة الورق المفضض اللى كنت بحس ايدها نفس اللمعان والجمال.... دلوقت بشوف منها كل حاجة في التلفزيون لكن بتفضل ايدها وهي ماسكة الورق المفضض الدهبي اجمل حاجة شفتها في حياتي.
وجمعت منهم كتير قوي وكنت الوحيد الفاهم أهميته العظيمة بلزقه على درفة شيش البلكونة وكنت متاكد انها هتقدر تعكس كل أضواء طايرات العدو بعيد عني انا بس بس لو كانت اكتر من كدا مش مغطية ضرفة شيش واحدة ؟
ولأن في مدرسة اضربت قريب من بيتنا بقيت ادور زي المجنون عن الورق الفضة ، مالقتهوش .... وفى نفس اليوم جمعت ورق لأقيته مرمي عند ناصية الشارع...كان اول جندي عملته زي الجنود البلاستيك بس كان بيلمع مع أي ضوء ..مش عارف ليه فجاة اتحول الورق المفضض في ايديا للجندي دا كان بيضحك وسمعت صوته بينادي تانين اتعملوا برضه من الورق المفضض انا بس مسكت الورقة لكن هما كانهم حركوا ايدي علشان يطلعوا منها واتعملت حاجات كتيرة مفضضة شجر وناس وعطيات وشوقي ونادر وانا ... لكن كان فيهم جندي شرير ليه كاب واحد بس رافع ايديه لفوق زي الراجل أبو شنب قصير ... ورافض أي حاجة ! بعد سنين من الوحدة ومعرفة كل جندي باسمه من مجموعة الجنود اللى بيلمعوا فى اوديتهم الكبيرة اللى هي فيها ناس كتير كمان نتلمع .. وفى طرف الاودة تحت الشباك فى عرايس البحر او الحوريات بتاعتي كل وواحدة ضحكت لى عملت لها تمثال جميل لكن كلهم طلعوا شبه عطيات . النار .... النار فجأة فى احداث مش عارف ايه دخلت البيت قنبلة غاز ........... والاوده ولعت ............
. كل الشقة ولعت لكن ماكنتش مهم الا بالعالم اللى بيلمع ... العالم اللى انا كل حاجة فيه ... النار خدت شكل غريب وهي بتحرق الناس المفضضه كانت بترقص وتلمع وتتلون اصفر أحيانا وهي بتاكل واحد واحيانا كانت بتنط من واحد لواحد وانا بس بسمع صراخاتهم ... النار كانها كانت بتحضنهم وتجمعهم مع بعض زي ماكانت الشلة كلها بتتجمع زمان ياتري لسه لى مكان معاهم ليه ماسابونيش اروح معاهم ؟
اهتموا بي قليل قوي وانا بعيط على جنب وبعد شوية كنت لوحدي على جنب في الشارع وريحة الورق المفضض لسه في الجو زي صرخة واحد لسه بيموت
كل شخصية اختفت هترجع تاني لكن مش هرجع أبو شنب قصير ولا ماعرفش ممكن يرجع غصب عني المرة دي..... وبدأت افكر اجيب منين الورق المفضض المرة دي !
ليست هناك تعليقات:
إرسال تعليق