من سنين وأنا بتألم . من سنين وأنا بتجرح . من سنين وأنا بتأذى وبتعذب وبعانى . من سنين وأنا بتقتل . طعم الوجع عمره ما كان جديد عليا . الجديد الشخص اللى أنا بدوق منه طعم الوجع ده .
ولأن الأنسان ده الأرحم ، الأكرم ، الأنبل والأجمل فى الناس اللى وجعتنى على مدار السنين . أنا واثقة أنه أكتر حد هيترحم عليا . هيدعيلى ويقرألى الفاتحة . هيفتكرنى كتير فى صالح أعماله .
ولأنى بردوا عارفة الشخص ده كويس فأنا مؤمنة أنه هيعيش بعقدة الذنب وتأنيب الضمير . عمره مهينسانى ، هفضل جواه ووجعاه طول الوقت ، لأنه أنسان حساس ومرهف جداااا ، روحه نضيفة .
وربنا وحده اللى يعلم أد ايه أنا حاولت متكونش ضربته دى هى الضربة القاضية فى مباراة حياتى . لأنها فعلا مش هتبقى الأبشع ولا الأسوء والأكثر سفكا لدمائى .
بس للأسف بردوا هتبقى ( القشة التى قسمت ظهر البعير ) البعير ده اللى أستحمل كتير وكتير جدااااااا . فوق طاقة وإحتمال البشر . عمره ماشتكى ولا نخ ولا حتى ظهر عليه أى ضغط . ولا حتى عمر حد حس بيه وحاول بخفف حمله .
حملى زاد أوى . كتافى وضهرى مبقاش حمل الهوا . خلاص معودتش قادرة أستحمل نفسى أكتر من كدة . والوجع معدش جسمانى بس ولا نفسى ولا عصبى . روحى هى اللى عادت وجعانى ووجعانى بشكل مخيف .
#سمر_إسماعيل
ليست هناك تعليقات:
إرسال تعليق