ما أن دخل المنزل وغير ملابسه ، تناولا الغداء سويا ، دخلت المطبخ لتنظف الأوانى وتعد الشاى وخرجت أذا به إختفى ؟؟؟
إختفى وهو مازال موجود إلى جوارها !!! حلق عالياً بعيداً فى سماء هاتفه ، حتى أنه ما عاد يدرى بوجودها على وجة البسيطة ، فلم تعرف كيف تجتذبه أبدا من هذا الأنشغال والتجاهل ؟!!! ولا تريد أن تحادثه فى أى شئ فتبدو أمامه ثرثارة فارغة … فهى دوما ما تشعر معه بالعجز وقلة الحيلة ، فلم يعد أمامها غير سؤالها الممل الذى يقفز حولها طيلة الوقت ولكنها كانت تصرفه لأنها تعلم جيدا مدى إستيائه منه _ عايز تاكل ايه ؟!!!
لكن ما عاد لها بُد منه … فها هو غارق حتى أذنيه فى عالم آخر غير ملقياً إليها ببال . فقررت أن تلقيه عليه وهى تدعو الله من كل قلبها الا يصدمها بإجابته المعتادة _ أى حاجة ، وهو لم يرفع وجه حتى من هاتفه …
_ عايز تأكل ايه ؟!!!
فكأنها بسؤالها هذا فى هذة اللحظة قد أعلنت إشارة بدء الحرب العالمية الثالثة …
فترك هاتفه جانباً قبل أن يلتفت إليها …
_ عايز تاكل ايه ؟!!! وأنا من أمتى بقولك أنا عايز أكل ايه ؟!!! مانا كل يوم بأكل الموجود واحمد ربنا وأبوس أيدى وش وضهر وأقول اللهم ديمها علينا نعمة وأحفظها من الزوال … وبعدين تعالى نتخيل مع بعض كدة ايه اللى هيختلف فى نواميس الكون مثلا لو أنا كلت ( باشميل ) ومكلتش ( قولقاس ) ؟!!!
الشمس هتشاور عقلها وتغير رأيها وتطلع بكرة من المغرب ؟!!!
فيه نيزك تايه فى الفضاء الخارجى وحدد الأرض كمكان لسقوطه دون عن باقى كواكب المجموعة الشمسية وغيرها من المجموعات ؟!!! المشاكل اللى فى مصر هتخلص يعنى ولا المصريين هيعرفوا هم عايشين أزاى وليه ؟!!! أثيوبيا هتبطل تملى فى السد وتردمه ؟!!! المتظاهرين فى لبنان هيكتفوا بهذا القدر من الثورة ويروحوا بيوتهم ؟!!! تركيا هتخرج من سوريا وتسيبها فى حالها ؟!!! الإرهاب اللى فى العالم هينتهى فجأة وسمانا هتتملى حمام شايل أغصان الزيتون ونبقى صدقا ، قولا و فعلا ( خير أمة أخرجت للناس ) ؟!!! طيب فيها تحرير للقدس ؟!!! مش شايفة أن دى أخر حاجة ممكن تشغل إهتمامى ؟!!! مش شايفة أن حياتنا عادت جدا سخيفة ومملة ؟!!! مش شايفة أنه أكيد فيه مليون حاجة أنا محتاجك تعملهالى غير أنك تسألينى _ عايز تأكل ايه ؟!!! مش شايفة أننا بعدنا أوى عن بعض ؟!!!
فأحنت جبينها من الأسف والندم ، فهى تعى فى قرارة نفسها أنه لديه كل الحق فيما قال … ورفعت عينيها المنكسرتين تسأله فى صوت ملئة الذلة _ يعنى مش هتقولى عايز تأكل ايه ؟!!!!
#سمر_إسماعيل
ليست هناك تعليقات:
إرسال تعليق