آخرتها فى العلاقة . بموت بكل بساطة . طفلة دابت فيك زى حته الشيكولاتة . برجع لكل شات كان بينا . بقارن وصلنا لأيه ؟!! أزاى كنا ؟!!! أزاى أستخسرنا حنانا فى روحنا ؟!!! أزاى كان بإيدينا نداوى جروحنا ؟!!! فاكر كلامنا وضحكنا مع بعض ؟!!! كنت بقولك كل كلام عمرى فى يوم ما قولته لحد . كنا بنضحك بس بنضحك من القلب بجد . ليه أخترت البعد ؟!!! ليه الكفر وليه العند ؟!!! كنت قاعدة مربعة فى محرابك بتعلم . كنت بغمض عينى وأسيب روحى معاك تتكلم . عمرى ما تخيلت أنى بيك أنت أتألم . أفتكرت عيون كات بتزغلل من صورتك حتى فى تاج ، وصوابع بكلمها معاك كات بتنور . دمرنى حبك بطريقة أبشع مما كنت أتصور . مصدومة وموجوعة مش قادرة أفكر . أزاى وليه تتغير ؟!!! مش أنا الطيبة ؟!!! بنت الأصول ، العشرية ؟!!! عملت ايه أسأت ظنك فيا ؟!!! مش ذنبى انى أتعاملت معاك بحسن نية ؟!!! ده ذنب الندل قلبى . ولا بيعرف يدارى ولا بيقدر يخبى . كان سابنى فى همى وغلبى . مكونتش حمل انه بيك يوجعنى . كنت بفرح بخوفك وغيرتك عليا . كنت بحس أنى قومت بعمل بطولى لما تضحك بسببى . كنت أنت تنده فى التو واللحظة ألبى . من غير ما أقولك أو تقولى ، كنت حساها وحسسها أنك أنت أبن قلبى . كنت مطمنة أنك جمبى . دايما شايفنى وسامعنى . مش قولتلى كلامك دايما بيسعدنى . كنت حاسة بيك حاسسنى . قلبى بيرقص من سعادته لما تقولى أنك عايزنى . مش عارفة ليه بتحرمنى من أحساسى بيك ؟!!! دنا كنت راضية بس أفضل بين أيديك . دنا كنت عايزك تتمنى وأنا أقولك : شبيك لبيك . مش عارفة ليه بتأذينى فيك ؟!!!! رغم جحودك ونكرانك حسيت أنى صعبانة عليك . عشت نهايات مؤسفة كتير وحياتى عندك متكررها . حاول تكسب نفسك بيا ، صدقنى مش عيزاك تخسرها . قدر بس إحتياج أنثى شيفاك أنت مصيرها . أنا طاقة عشق وحياة حبك تستثمرها . متخافش عليا معنديش غيرك حاجة أخسرها .
#سمر_إسماعيل
ليست هناك تعليقات:
إرسال تعليق