ياللي أنت ماشي ف سكتك
حاسب تتوه من خطوتك
دوس على الشوك واتألم
الألم مسيره في يوم يزول
بعد الصبر اللي تتمني تنول
دا مسيره الجرح يتلملم
وإياك تكون مجروح القلب
او جارحه ، دا شيء صعب
دي القلوب جرحها بيعلم
حاول ، وعافر ، ولا تيأس
حب الحياه عيش واتنفس
واوعي منها أبداً تتظلم
دي دنيا ومهما تكون فانية
عيشها لو تقدر كل ثانية
علشان في يوم ما تتندم
تعيشها ليه في نكد وحيرة
راسم علي وشك التكشيرة
يا عم فكها عاندها واتبسم
ليه دايما حزين موجوع
بإيه يفيد اللي ملهش رجوع
عمر اللي مات ما هيتكلم
خليك إنسان وخليك طيب
دي عمر الطيبة ما تتعيب
مهما قالوا في نفسك اتحكم
خليك جرئ في الحق واتمسك
الحق عالي مهما الباطل اتفزلك
خليك قوي واوعي تستسلم
ومهما زاد الوجع لازم يروح
اكتم وداري فيه واياك تبوح
دي الناس لو شافوك مجروح
أو ضعيف علي نفسك اترحم
....
ياسر بسيوني
ليست هناك تعليقات:
إرسال تعليق