التعب اللى صابنى من يوم ما بعدت عنك مش بس تعب عضوى وجسمانى . لأ ، ده دمار نفسى ، غصة فى القلب ، شرخ فى الروح . بقيت أعقل وأنضج بمراحل ، بقيت أضعف وأهش بكتير .
باكل كل لما أمى تغصب عليا بالأكل . باكل بس مفيش حاجة ليها طعم ، كله زى بعضه . بنام 3 ، 4 ساعات فى اليوم بس عايشة . بقعد لوحدى ، بكتئب ، بعيط ، بس بعرف أستمتع بأحزانى .
بتكلم ، بضحك ، وبهزر مع أصحابى . بخفة دمى ، عفويتى ، وحلاوة روحى اللى أنا متأكدة أنك لسه فاكرها . بضحك كتير ، مببطلش ضحك وبضحك كل الناس . وبتريق على أى حد سوداوى وكئيب .
أنا #الفرفوشة و #الربيع_الدائم و #عشق_لا_ينتهى وأنا أتعس مخلوقة على وجة الأرض . بس دايما الناس ملهاش ذنب فى بؤسى وشقائى . ولا أنا ليا ذنب ولا أنت ليك ذنب . كل شئ قسمة ونصيب . كل شئ متقدر ، وعد ومكتوب .
بتحب كتير وبحاول أحب بس مش عارفة الحقيقة . تفتكر العمر فيه كام 15 سنة عشان أحب أنسان تانى زى ما حبيتك ؟!!! أحبه كأب وأخ وصديق ؟!!! أحبه من قبل أصلا ما أعرف يعنى ايه حب ؟!!!!
ربنا يسعدك فى حياتك اللى أنت أخترتها حتى لو أنا مش فيها . يارب فى يوم ما تدوق طعم الحرمان اللى عمرى ما دوقت غيره من يوم ما سبتك . يا رب متحس أبدااااااا بالفراغ القاتل اللى أنا حاسة بيه .
وأنعدام الثقة فى نفسك وفى اللى حواليك . عشان كان فى أنسان مالى عليك نفسك ، قلبك ، عقلك وروحك . أنسان حكمت عليك الظروف ، العقل ، المنطق والواجب بالبعد القصرى عنه . ومعدتش تعرف عنه أى حاجة . ولا حتى فى بينكم أى وسيلة أتصال غير فى الخيال بس .
أطمن محدش قدر يملى فراغك جوايا . عشان أنت مسيبتش أصلا أى فراغ . ولا حد قدر يعوضنى حرمانى منك اللى كل يوم بيزيد . متقلقش عليا أنا بخير بخير طول ما أنت بخير وسعادة . خد بالك من نفسك .
#رسائل_لن_ترسل
#فضفضة_روح_متعبة
#سمر_إسماعيل
#عشق_لا_ينتهى
ليست هناك تعليقات:
إرسال تعليق