لو كنت أستنيت معايا . كنت أستنيت وبقيت … كنت هتشوف فى عيونى مرآية . وفى قلبى ده بيت . كنت عدلت فآمنت فنمت . كنت أنا فضفضت وللوجع عريت . كنت حكيتلك عن ماضى كان كله كلاب . عن جثة قلب كان فاضى ، سابنى بين نار وعذاب . عن مر عمره مفارقنى . عن زيف عمره مصدقنى . عن ظلم عمره منصفنى . عن حلم لقيط فى وطن كداب . عن بومة بفعل حداية وحداية فى شكل غراب . كنت صحيت … وأنا كنت هبقى بلقانا جناين حب بتفتح ورد . حكاية عيونا بتحكيها ، لا فيها قص ولا سرد . تعملك لمشاعرك جرد . تطلع للعيبة الكسر فى قلبك كارت الطرد . كانت هتضمك أشواقى بين جزر ومد . وأحليلك بنار حبى طعم البرد . أعصر قصايدى على شفايفك فتنزل شهد . كنت جريت كما الدم فشريانك . كنت حجرت دمع عيونى علشانك . كنت رميت نفسى فى حضن بركانك . وعلى حيطة ضهرك بس كنت بكيت . على أحزانك الفاتحة أنا كنت قريت . كنت بدموعك الغالية أتوضيت . ولندا عشقك كنت أنا لبيت . طوفت حوالين روحك الطاهرة . بتوسله يخلصنى من أمبارح ، وينجينى من بكرة . وبين الفكرة والفكرة ، فى بالك أنا كنت سعيت . كنت فى محرابك صليت . لو كنت أستنيت … لو كنت … ياريت …
#سمر_إسماعيل
ليست هناك تعليقات:
إرسال تعليق