إهداء
إلى تلك التى استماتت شوقاً وحنين ولهفة كى تبدو بتلك القوة والصلابة
إلى تلك لم يؤذيها أحد قط كما فعل إحسانها وحلمها وجنت عليها نفسها
إلى تلك الهشة ، الغضة ، المنكسرة ، شديدة التهشم التى مازالت على كبريائها تقاوم
إلىّ أنا .…
ثقة فى الله ستملئين الدنيا وتشغلين الناس .
( سمر الحياة )
( الحب)
الحب من أجمل المشاعر الأنسانية فى الدنيا دى والله يا جماعة ، حبوا ، تفائلوا خير ، وأخلصوا فى مشاعركم لبعض بجد . ومفيش أى تنافض على فكرة لما أقول أننا أسرى مجتمع ذكورى وبين لما أتكلم عن الحب ، عشان الحب إستحالة يتواجد بين ذكر وأنثى ده مرض _ ربنا يعافينا _ الحب بيتواجد بين راجل وست ، اكبروا بقى ، أعقلوا وأنضجوا شوية
راجل عارف قيمة نفسه كويس جدا جدا جدا عشان كده عارف قيمتك وشايلك دايما فوق راسه ، الحب لما تبقى طايرة من الفرح ان ليك راجل مسنودة عليه ، امان وحماية ، تطبطبوا على بعض ، تخففوا على بعض وطأ الحياة ومعاناتها .
الحب مش 100 رسالة وشات مفتوح بينكم طول الوقت لما يكون هو فاضى لا الحب يعنى رسالة بسيطة فى عز مشاغلة والدنيا متطربة حوليه ، فى زحمة يومه وهو ف شغله بس بيتطمن عليك ، بيطمنك عليه .
الحب علاقة مريحة ولذيذة ، بتتكلموا مع بعض بمنتهى الحرية بدون أى تخوف من سوء ظن أو حد فيكم يزعل من التانى ، عشان انتوا مش بس فاهمين ومستوعبين بعض لأبعد الحدود لا أنتوا كمان حاسيين بعض جدااااا
الحب يعنى أنت أيووووووة أنت لما تقرأ كلامى ده وتبتسم وتبقى عارف انك انت المقصود بكل كلمة وكل حرف من غير ذكر اسماء الحب لما طول الوقت ابقى عايزة اعبرك عن تقديرى ليك و أمتنانى بيك وسعادتى بوجودك معايا وجمبى بجد شكرا لأنك فى حياتى
#سمر_إسماعيل
( سمر الحياة )
( الأحتواء )
هوا أحنا بجد صعبين أوى كده يا جماعة ؟!!! ولا أنتوا اللى مخكم ضيق ؟!!! معندكوش أى قدر من سعة الإفق ولا من الإحتواء ولا من الإستيعاب ؟!!!
خلئكوا ضيق ليه مع زوجاتكم وبالكم طويل أوى فى شغلكم ، فى البلايستيشن أو مع أصحابكم على القهوة ؟!!!
وترجعوا تشتكوا منهن ومن أهمالهم ليكوا وعدم أهتمامهم بمشاعركم ، ماهوا ده الطبيعى ( فاقد الشيئ لا يعطيه )
بالعقل والمنطق كده هيعطيه أزاى وهوا مش معاه !!!! أرض أنت مزرعتهاش ولا رويتها ولا أهتميت بيها ، هتثمر ايه ومنين ؟!!!!
ليه متسمعش مراتك ؟!!! تحتويها ؟!!! تستوعبها ؟!!! وتصاحبها ؟!!! ليه التسلط ؟!!! فرض الرأى وسياسة ( سى السيد )
وأن كلمتك هى اللى لازم تمشى ؟!!!!
أيه القرف ده ؟!!! طايقين نفسكم أزاى ؟!!! أنت متعرفش أنك كده بتقهرها ؟!!! ( وأما اليتيم فلا تقهر ) والمرآة يتيمة فى الشرع وفى الإسلام ، فهى من فى كفالة ورعاية أبيها إلى كفالة ورعاية زوجها .
يعنى ربنا سبحانه وتعالى بعتك ليها عشان تقويها ، تجبر بخاطرها ، تأوى ضعفها ، متكسرهاش .
ليه متسيبهاش تخرج كل اللى جواها ، تزعق وتصرخ وبعدين تقولها بحبك هتترمى فى حضنك ويخلص الموضوع على كده ؟!!!
والله أحنا بالبساطة والسهولة دى ، بس أنتوا اللى محتاجين شوية مرونة ، تغيروا نظرتكم لحاجات كتير ، تكسروا أصنام عادات وتقاليد أفسدت عليكم حياتكم وضيعت كتير أوى من عمركم
( سمر الحياة )
الزوجة التانية
من المواضوعات الشائكة جدا بالنسبة لى الحقيقة وعمرى ما عرفت أحسم الجدل فيها فقولت أعرضها عليكم ونتناقش مع بعض ،…
مفيش خلاف أن التعدد شرع ربنا ، وكون الراجل والست يفكروا فى شرع ربنا قبل أى حاجة تانية فى فترة الأنحلال والتردى الأخلاقى اللى أحنا بنعيشها دى ، ده فى حد ذاته شئ جميل ويحتسبلهم … بس ؟!!!!
بس أنتِ قبل ما تقدمى على الموضوع ده كنتِ مدركة أنكِ هتبقى المظلومة الأولى والأخيرة فيه ؟!!! كنت عارفة أنكِ بتوهبى كل حياتكِ لراجل أنتِ هيبقى ليكِ حيز ونطاق معين ومحسوب من حياته ؟!!! راجل عنده بيته ، مراته ، شغله وأولاده يعنى أنتِ هتبقى على الهامش !!!! كنتِ بتفكرى فى ده ؟!!! ولا الحب كان عامى عينيكِ
_ بس هو قالى ...……
__ بيقولوا كتير يا ماما ، الكلام مفيش أسهل منه وربنا . بس التنفيذ والواقع حاجة تانية . مش هعرف أقولك حاجة الحقيقة أنت اللى عملتى فى نفسك كده …
ومسمعش واحدة تقولى تستاهل ملقتش الا الراجل المتجوز تلعب عليه وتخرب بيته …… متشتغليش نفسكِ بيتكِ خربان أصلا من زمان ، ماهو أنتِ لو ماليه عينه ومكفياه ، ومش معيشاه فى ( خميرة عكننة ) مكنش أحتاج يدور على الحب ، الحنان والأهتمام فى حتة تانية ……
دمرتيها ودمرتيه ودمرتى نفسك بعندك وغبائك …
#سمر_إسماعيل
( أمانة عليك )
أتقدرلك أنك تشوف أنا بحبك أد أيه ؟!! وأنا أصلا حالتى أيه ؟!! وأنت بتقابل كل ده أزاى ؟!! قسما بالله هتكره نفسك أوى .
أنا بظهر قوية ومتماسكة بس عشانك !!!
عشان أنت تشوفنى كده ، عشان مشيلكش هم فوق همك وأنت مش ناقص ، عشان لما تسألنى أزيك ؟!!! أقولك بخير .
بدارى وجعى اللى ملوش حدود وأفكر فيك وفى وجعك .
بلملم كسر خاطرى عشان أطيب وأجبر بخاطرك .
متصدقش الصورة اللى أنا برسمها عن نفسى وظاهرة بيها قدامك طول الوقت .
أنا مش جبروت ، أنا حلاوة روح كل يوم بتموت .
أنا أضعف وأتفة من كدة بكتير ، أنا أبسط وأغلب خلق الله ، صدقنى والله مش بكدب .
أى واحدة ممكن تقولك أنها بتحبك بقلب سليم وبال رايق ، لكن أنا بقولهالك بتنزف دم ، وجع ، كمد وهم .
الباء براءة بكتنى سنين كتير وحيدة على سرير من الشهوة . الحاء حنية زى خنجر مسموم بيقطع فيا بكل برود ، حتت أزاز مغروزة فى قلبى وفى عنيا . الكاف كونى حسيت فيك بإختلاف . أنك أنت غيرهم .
آااااااااه لو حسيت بحجم وقوة إحتياجى وإشتياقى ليك ، آااااااااااه لو شوفت السواد اللى أنا عايشة فيه من غيرك ، آاااااااااه لو عرفت حرمانى منك بيعذبنى أزاى ؟!!!
كنت إستحرمت مشاعرك دى على أى حد غيرى . بالله عليك متستقوى عليا ، عشان أنا بجد مش قادرة و مليش حد غير ربنا أشتكيله ، وعمرى مهشتكيله منك . متأذنيش فيك وتوجعنى بيك أمانة عليك .
#سمر_إسماعيل
( أرجعلها )
وبعدهالك ؟!!! لحد أمتى الظلم ده ؟!!! ولحد أمتى هفضل أتوجع عليك وأنت عايش مقسوم كده ؟!!! ولا منك ليا ولا منك ليها . صدقنى أنت مش ناسيها . كل حاجة منى بتفكرها هى . تعبيراتها ، تنهيداتها ، كلامها وسُكاتها . حتى طيفها ، لسه ساكنك ، رافض فيك يخلف ظنونها . من كتر عشقك ، ليها حساك معايا بتخونها . أنا تعبت . ف علاجك منها فشلت . بحبى ليك وأنا عارفة بكونها ف حياتك . لروحى ظلمت . حاولت أحارب وجودها فيك . وف كل معاركها أتهزمت . كل ليلة وأنت معايا ومش شايفنى بسهر وببكى مع القمر . بتصعب عليا نفسى لما تقولى أنك فاكرنى وتنادينى : يا سمر . ضيعت عمرى معاك هدر . ده المكتوب وده القدر . لساك عاشقها . رغم كل إخلاصى ليك . لساك عاشقها . بتبيع ف قلبى المشتريك . وساكنه فيك بكل تفاصيلها . أرجعلها . لون بحبك عمرها . أنت أصلا مهما تنساها فاكرها . مهما تحاول مش هتبقى لحد غيرها . وأنا هبعد . عشان نبض الهوى ف عروقكوا يتجدد . حاول بجد عشان خاطرى تبقى أسعد . سيبلى بس من ألوانك اللون الأسود . تذكار لحبك . متقلقش أنا مش هبقى لوحدى . معايا نظراتك وأبتسامتك . أهو عمر وهيعدى . سامحنى حبيتك غصب عنى . أسمحلى بس بعد أذنك . بين الوقت والتانى أكلمها . عشان تبقى تاخد بالها منك .
#سمر_إسماعيل
( الفراق )
الحب مش لعبة . الحب مسؤلية وأمانة .
سئل على بن أبى طالب كرم الله وجهة :
_ أهناك شيئ أشق من الموت ؟!!!
قال رضى الله عنه وأرضاه :
_ نعم ، فراق الأحبة أشق من الموت .
فى ناس كدة ، لما بتحب حد وتفترق عنه ، بتعيش الموت كل يوم فى غيابه 100 مرة !!! حالها بيصعب على الكافر ، من بؤس ، ضيق ، قهر وكمد ، معاناة دايمة مبتنتهيش ، بتموت حرفيا والناس كلها حواليها ومحدش قادر يعملها حاجة .
مفيش أى حاجة من أى حد لا بتضرها ولا بتأذيها ، عشان ( وماجُرح فى ميتٍ بألم ) .
لما جسمها بيوجعها أو بتبكى لأى سبب بتفرح !!! عشان بتحس أنها لسه عايشة ، لأن مفيش ميت لا بيتوجع ولا بيبكى .
الموت نفسه بيبقى بالنسبة لها حلم جميل وأمنية عظيمة .
رفقا بالناس دى ، لو أنت مش شايف فى نفسك مسؤلية أنك تدخل فى علاقة وترتبط بأنسانة ، متعلقهاش بيك .
وأنتِ كمان لو مش حاسة نفسك هتقدرى تتحملى واحد بكل ظروفه وتبقى معاه على المرة قبل الحلوة ، متغامريش .
دى أمانة ربنا سبحانه وتعالى هيسألكم عنها يوم القيامة . أتقوه فى نفسكم قبل ما تتقوه فى الغير .
#سمر_إسماعيل
( أبتسمى )
فرحت جدااااا . لما قالولى أنك أنت باينة أحسن . ولو أنى حاسك . حزينة دايما . حاسس بألمك . حاسس بهمك . حاسس بأنك فى وسط الكل وحدك . سامحينى معرفتش أبقى عند حسن ظنك . مقدرتش أتطبع بطبعك . معرفتش أبقى ناسك وكل أهلك . مقدرتش أبقى بموت من الخوف عليك وأضحكلك . معرفتش أخدك وأطير . كيانك أكبر منى بكتير . أحنا الأتنين ، فيلمين ، ليوسف شاهين ، أنا الآخر وأنت المصير . بس لسه فاكرك . فاكر هزارك ، ضحكك ولعبك . فاكر مكياجك ، برفانك وتسريحتك . فاكر عياطك وزعلك . كنت حافظك . كنت ببقى فاهمك ، وأحب أسمع لكك وعجنك . لسه بعمل ناسيك . لسه غصب عنى عايزك . لسه بضعف لما تيجى سيرتك . لسه خيالى رافض يفارقك . بيصعب عليا لما أبص فى مكانك ، والأقينى مش شايفك . لسه آويانى جبال الطيبة والحنية . لسه مش ناسى مسحة روجك فى الكوفية . لسه شاغلنى خوفك عليا . لسه فاكر قلبى وروحى وعنيا . أنا هبقى كويس متقلقيش . أنت عاملة ايه ؟!! لسه مبتناميش . لسه بتنادى بعدالة وحرية وعيش . لسه لو حد سألك مالك ؟!! بتقولى مفيش . لسه بلكونة بتطل على الجنة مقفولة أزاز وشيش . لسه دموعك وإبتسامتك وكل مافيك دنيا متتنسيش . عارفك لسه شاغلة بالك مين بياخد باله منى . لسه بتحبينى غصب عنى . لسه روحك شيفانى وقلبك سامعنى . سيبك منى ، فى وش كل متضايق أبتسمى ، على كل الخلايق أترسمى ، عيشى ، حبى ، أفرحى وأنسى . لسه عاملة باسوردك بأسمى ؟!!!
#سمر_إسماعيل
( الحكايات )
بتبدء الحكايات . من أول م نخلص شات . وتقولى سلام . أحلام ياما كتير أحلام . كلامنا مش زى أى كلام . أيموشن منك جه عفواً . ولا ريأكت ع رسالة كان سهواً . بيخطفنى لسنين قدام . بنجرى نكمل الأمثال . ويبقى دقيقنا من زيتنا . ونبقى لبعض بيت وعيال . أنت أبن حلال . بجناحى اهو بعملك بُردة . تعالالى وطير . صحى فى عيونى القدس بكلمة تصبحى على خير . شوف العزة فى غزة . وولع شمع للعدرا . زور حائط المبكى . وأحلم فيا بالتحرير . أنا الحرية اللى مسلوبة . أنا الفرحة اللى مغلوبة . أنا لكل أوجاع العرب دساتير . هواك الغالى بياخدنى لمتعة ألذ من الأفلام . نعشق وندوب فى شوق وغرام . ونحب كتير . منحبش ليه ؟ بقولك ايه ؟ سيب بالى وتعالى فى قلبى خلينى أنام .
#سمر_إسماعيل
( طاوع قلبك )
مش عيزاك تطاوعنى ، عيزاك تطاوع قلبك . صدق نفسك . صدق أنى هبقى بكل جبروتى بتاعتك . أمك و بنتك وصاحبتك وحبيبتك . لما عقلى وكبريائى يمنعونى عنك . وقلبى يثور عليهم ويفضل يهتف بحبك . لما تبقى حافظنى زى أسمك . واثق ان حضنى ، رغم الدنيا ، الناس ، الظروف والكل عايزك . مفوضالك أمرى كله تحت أمرك . مليش أرادة قدام أرادتك . عايشة بس علشان سعادتك . مش عابرة سبيل . ولا عشق بديل . أنا أكبر وأعظم من كدة بكتير . أنا قلب مليان وعمران بحب وخير . أنا سندريلا الأساطير . أنا الرحمة والأحسان ، أنا الضمير . أنا اللى بتعملك من بُرديتنها سرير . أنا الصبح اللى مالوش مثيل . وأنا الليل الطويل . أنا الوصل والصبر وحتى الهجر الجميل . أرمى قلبك العطشان ف حضن النيل . متخفش مش هيغرق . حبنا لا يعرف عقل ولا منطق . أحنا ببعضنا ، بنفسنا ، بعشقنا مؤمنين والنار لينا مش هتحرق . طاوعنى بس وصدق .
( راودنى )
راودنى ...… منى عن نفسى راودنى ...… يا أجمل مسٍ عاشقنى ….. راودنى إجتياحاً يا سيدى ...… أن فضائكَ آخذنى ....… راودنى إجتياحاً عل الطيرْ …… فيكَ قابضنى ولامسنى ..…. يا أعظمَ ملكٌ بين رجال الكونْ …. سامحنى .… يا من أدمنتكَ فوق حدود البينْ …. عانقنى .… إن كنتُ تشتاقُ إلىّ …… فالشوق إليكَ قاتلنى .… ياعينَ القلبِ لتبصيرى .…. يا أبى … وطفلى … وحبيبى .… يا دنيايا … وعمرى … ومصيرى ..... يا دفءَ البردْ …… وهزلَ الجدْ …… وأسلمَ وجدٌ ناسفنى …… يا روحَ القلبْ …… وكلَ الحبْ …… وأحن َسلاحٌ قائدنى …… أنا أعرقُ مدائنَ الدمعْ …… وكمدى حدائقٌ فى بابل …… قهرى بالوسعْ …… كوكبٌ عاد قابرنى …… أشعرُ بالخوفْ .... فطمئننى ...… أشعرُ بالكسرْ .… فأجبرنى .… أشعرُ بالضعفْ ….. فراضينى ..... وظل جوارى غنيلى ...... لا تمل أبداً تدليلى .....قدر ما فى وسعكَ كبرنى ..... وتأكد أنكَ مالكنى ..... عفتكَ قانونٌ حاكمنى …… عزتكَ رداءٌ ساترنى …… قلبكَ سياجٌ من عطفٍ …… فاهمنى وحافظنى …… من أجلكَ دمرتُ قيودى …… مدركة الهدف لوجودى ..… وسجدتَ لطاعةِ معبودى .…. مؤقنةٌ أنكَ سامعنى ..... راودنى ...… منى عن نفسى راودنى ……
#سمر_إسماعيل
( خدى اللى بتحبيه )
من القيم المغلوطة ، الكتير ، الشائعة والسخيفة ، اللى ربينا عليها بناتنا وخلفتلنا أجيال من زوجات باردة وأمهات فاشلة .
( خدى اللى بيحبك ومتاخديش اللى بتحبيه )
البنت متحبش . وأن حبت مينفعش تترجم مشاعرها وتتصرف من خلالها . ليه البنت متاخودش راجل هى بتحبه ليه ؟!!! ليه حكمنا عليها بأنها تفضل دايما رهن إشارة الراجل ؟!!!
( الأباجورة ) اللى يشتريها عشان يركنها على ( الكومدينو ) أو على ( البوفية ) جمب التلفزيون ويشغلها وقت ما يحب !!!!
( طقم الكاسات أو الفناجين ) اللى بيتشال فى النيش لحين الإستخدام !!!!
ليه عمرنا ما عودنا البنت أنها تبقى صاحبة قرار ؟!!! ليه دايما تستنى راجل تبقى تحت طوعه ورد لفعله هوا ليه ؟!!!
البنت كيان ، عواطف ، مشاعر ، أحاسيس زى الراجل وأكتر بمراحل ، ربوا بناتكم على أن من حقهم يحبوا ، من حقهم يتمنوا ، من حقهم يحلموا بحياة هن عايزنها مش مرسومه لهن .
#سمر_إسماعيل
( تعالى نغيب )
تعالى نغيب … تعالى نرتب الكراكيب … ونسمع أحلى شعر نسيب … ونشرب أحن فنجانين قهوة … أسقيك الحب بشفايفى … وأخدك لعلم الغيب … لدنيا قبلك مخطهاش أنسان … نبعد فيها عن كل زمان ومكان … تعالى نسكت صرخها الأحضان … تعالى بأمر الحب نرضى و نسلم … تعالى ببعضنا .… ولبعضنا وبس نتطمن … منخافش لما نتكلم … لما نعانى ونتوجع ونتألم … تعالى نبعد حبة عن المعاناة … عن التوهة … عن الوحِشة… وقولة أه … تعالى نزور بلاد أحلام … حواريها حب وخير وسلام … تعالى نبقى لبعضنا منه الكاف والنون … تعالى نكون ... لبعض عيون … تدارى ضعفها المكنون … لا فى قاضى معاه بلطة … ولا جلاد من السلطة … ولا مسجون … ولا سجان بيسترضى فى كلب حقير … تعالى نطير … تعالى نودع عشقنا الممنوع … تعالى نشبع من هوانا الجوع … حرام قلبى يبات عليك موجوع … حرام يبقى كلامك ليا كله دموع … وأنا والله مهصلح فى باب مخلوع … أنا أتفة من كده بكتير … أنا قشة … أنا فاشلة … أنا عاجزة … متهالكة ومتهاوية … ميغركش أنى متماسكة … مريضة وعايزة تبقى طبيب … أيدها فى أيدك ورافضة تسيب … أمانة عليك تعالى نغيب …
#سمر_إسماعيل
( جميلة هى )
هى جميلة . جميلة بشكلٍ ولونٍ مختلف البتة . جميلة حتى فى أقصى حالتها حزناً . لطيفة وخفيفة كالفراشة ، عفوية وبسيطة كالأطفال . أنيقة جدا وفوضاوية جدا جدا من الداخل . تحمل بداخلها الشئ ونقيضة . الا أنها قادرة على أقناعك بالشئ بنفس قدرتها على أقناعك بالنقيض . لن تشعر أبدا بإستياء وأنت تجلس بين يديها كالطفل الصغير المدلل تستمع لنوادرها التافهة و أحاديثها الفارغة _ التى تودعها قالب منمق جدا من متعة القص والحكى التى تعلم أصولها _ لأنك تعى جيدا أن هذا الكلام هو التنفيس الوحيد عن كبت روحها . تشبة أبيات نسيب قديمة ، غير مفهومة _ على وجه الدقة _ و غير معروف نسبتها . لكنك لا تنساها أبدا . لن تعلم عنها _ مهما حاولت _ الشئ الكثير الواضح . الا أنك ستظل تعجب كم هى رائعة بكل هذة السوداوية
#سمر_إسماعيل
( ربنا بيحبنى )
والنعيم وكرم ربنا سبحانه وتعالى دنيا وآخره .
كمل الأية : ( وجعلنا بينكم مودة ورحمة .......
الكلمتين دول معجزة حية تمشى على قدمين !!!
على بلاغة ، دقة التعبير ، سمو الوصف فى اللفظين اللى أستخدمهم المولى عز وجل لإشتمال كل المشاعر ، العلاقات وأشكال الحب اللى ممكن تكون بين الزوج وزوجته .
المودة : اللى هى المادة الخام النقية والأصيلة اللى ودعها سبحانه وتعالى فى قلب الأنسان ، المودة مش بس لفظ قرآنى فى غاية التهذيب للتعبير عن تلك المشاعر اللى تجمع الحب بالرغبة ، المودة فيها خوف وحرص .
تحس الكلمة من طيبتها وحنيتها بتطمنك ، بتطبطب عليك وعايزة تاخدك فى حضنها .
الرحمة : دى بقى إعجاز الإعجاز ، مش بس حنية ولا حب ولا إهتمام لأ رحمة ، والرحمة دى من أكتر الصفات أقترانا بيه جل وعلا فى القرآن الكريم و فى أسمائه الحسنى ، تنويها و تأكيد على أهمية الصفة دى عنده وقربها منه ، فهو الرحمن الرحيم وهو الذى وسع كل شيئ رحمة وعلما .
الرحمة دى طائر بجناحين ، جناح العزة وجناح الذل .
أيه جناح العزة ده اللى هكتسب منه صفة الرحمة ؟!!!
( رحم الله أمرء عرف قدر نفسه ) أزاى وبأى عقل وأى منطق عايزة زوجك يقدرك ويرحمك وأنتِ مش عارفه تقدرى نفسك وتعزيها عشان ربنا يرحمك ؟!!!
اللى تقولكِ أهتمى بنفسك وخدى بالك منها ، روحى ( الجيم ) وروحى ( الكوافير ) ، جميل مقولناش حاجة … بس أهتمامكِ بنفسكِ وتقديركِ ليها مش بالتفاهة والسذاجة دى ؟!!
أهتمى بروحك ، قلبك ، عقلك ، جددى صفاء نيتكِ أول بأول ، هذبى مشاعركِ ، نقيها ونمقيها دايما ، كبرى عقلكِ ، أشتغلى عليه ، أتعلمى وأستزيدى كتير ومش تعليم شهادات لأ تعليم تحضر وثقافة .
الرائع الراحل د / مصطفى محمود قال كده لو سقط مؤمن وكافر فى البحر ، فسينجى الله الذى تعلم السباحة ، فالله لا يحب العبد الجاهل .
مينفعش تبقى مؤمن بيه أصلا على دين أقرأ وتبقى جاهل ؟!!!
قربى من ربنا أكتر وأكتر ، عشان يفتح عليكِ ويعرفكِ قيمة نفسكِ ، مواهبكِ ، القدرات اللى حطها فيكِ وأنتِ غافلة عنها وأزاى تنميها ؟!!!
ده كله فى جناح العزة ، أيه بقى حكاية جناح الذل ؟!!! أولا : جناح الذل ده لفظ قرآنى والله مش جيباه من عندى .
( وأخفض لهما جناح الذل من الرحمة ) الذل مش ضعف ولا حاجة وحشة ، أحنا اللى عندنا للأسف ، سوء فهم ، إبتذال وتشويهة لمعانى كتير فى حياتنا .
أيه مشكلتك لم أنت وزوجتك تتذللوا لبعض ؟!!! الذل كمال ، كرم أخلاق
( ربنا بيحبنى )
أنا أستاهل يا جماعة والله .
أستاهل واحد يحترمنى ، يحبنى بجد ويشكر ربنا على وجودى فى حياته ، يبقى ممتن وسعيد بيا طول الوقت .
أستاهل أتقيم وأتقدر صح ، التقدير اللى أنا أستحقه بس ، مش طالبة أكتر من كده ، من غير مجاملة ولا مبالغة ولا مغالة ، تقدير معنوى يحسسنى بقيمتى وجدواىّ عند الأنسان اللى أنا بحاول أسعده .
أستاهل واحد أحس أنى بكل فوضويتى ، تقلباتى ، عنفوانى وشتات نفسى ، قطعة منه ، يعرف بجد يستوعبنى ويحتوينى .
أستاهل واحد أنا أكون كل حياته ، دنيته ، شغله الشاغل ، الحاجة اللى بيفتح عينه عليها أول ما يصحى من نومه وآخر حاجة بيغمض عليها عينه قبل ما ينام .
أستاهل حنية وأهتمام كتير وكتير جدا كمان . أستاهل واحد ميعاملنيش بمزاجه ولا يحطنى على قايمة أولوياته عشان أنا أكبر بكتير من أى قايمة وأهم بمراحل من كل أولوياته .
عشان أحنا سطحين أوى فى فهم وإدراك معانيه _ سبحانه وتعالى _ مراميه ، رسايله ومقاصده ، المصحف بالنسبة لينا كتاب قيم مجرد كتاب !!!
مركون على رف فى المكتبة أو محطوط على ترابيزة ، زى طقم كأسات غالى فى النيش !!!
مبنربطش معانيه ، ألفاظه ومفرداته ببعضها ، مبنتعمقش فى بديعه وفى بيانه ، فشايفينه كده حاجة جامدة مبتتحركش !!!
مش عارفين أنه لأ ؟!!! القرآن الكريم كائن حى بيتنفس ، بينبض و عايش بينا ، بس أعظم وأبدع من أى كائن حى …
لو بصيتله بعين الفنان هتلاقيه أجمل فنان ، لو شوفته بعقل الفيلسوف هتلاقيه أحكم فيلسوف ، لو حسيته بقلب العاشق هتلاقيه أرهف عاشق .
فى الأول وفى الأخر هو أنسان بقلب ، عقل وتكوين كامل بتشوفه حسب مراية نفسك ألا أنه دايما أجود وأكرم .
قال تعالى فى كتابه العزيز : ( سبحان الذى خلق لكم من أنفسكم …… أزواجا …… ليه يارب خلقتلنا من أنفسنا أزواجا ؟!!!
دقق أوى وأستمتع بإعجاز وبلاغة القرآن الكريم العظيم فى الإجابة ، اللى من كلمتين ، كلمتين وبس ، بس فيهم حياة ودنيا تانية .
( لتسكونوا إليها ) يعنى ايه ؟!!! الدنيا دى مش مستقر ولا مقام ، مش دار بقاء وخلود ، أحنا فى الدنيا دى ضيوف وسكان .
أهو أنا يا أدم خلقتلك حواء دى من نفسك جزء وقطعة منك عشان تعيش فى الدنيا دى علشانها …
ده كلام ربنا والله مش كلامى ، أهو أى أنثى خلقها ربنا مهما شوفت من قوتها وجبروتها بتبقى محتاجة تحس بالمعنى ده حرفيا والمعنى ده وبس .
اللى أحساسها بيه بيخليها تعمل عشانك المعجزات ، وبيكتبلك أنت السعادة وال
( فارس وجواد )
أستيقظت اليوم فرحة للغاية . مستمتعة أثر حلم ظل يراودنى ليله أمس . لعله خير ، فقد كنت أحلم أنى صاعدة درج بيت ليس بيتى ولا أعرفه ، ولكن كأن علاقة وثيقة بينى وبين المكان وأهله !!! فإذا بى أجلس على يد كرسى تجلس عليه سيدة كبيرة فى السن لم أراها من قبل ولكننى أعرفها جيدا !!! فأقبل رئسها مبتسمة وأنا أقول : مبروك يا ماما
فتطرق عدة مرات على كفى الذى يحتضنها وهى تضحك ضحكة جميلة من قلبها : الله يبارك فيك يا حبيبتى
وإذا بشاب جميل الهيئة ، طويل ، ممشوق القوام ، حسن المظهر يخرج علينا فى طقم أسود ( بليزر كت وبنطلون چينس )
بقترابه تبدو جلية حلاوة ملامحة ووجاهة طلته ، وسامته ، بشرته السمراء ، عينيه العسليتان ، أنفه الصغير الدقيق ، شفتاه الصغيرتان ، المحددتان ، المرسومتان ، مبتسما إلى بإبتسامة رائعة خلابة فإذا بى أضحك ضحكة عفوية مرحة وأنا أخبط ذراعه قائلة : مبروك يا عريس فيبتسم بخجل لذيذ قائلا : الله يبارك فيك .
فيستدير وكأنه يحادث أحد فإذا بأثر جرح قديم أو ندبة فى أعلى ذراعه تلفت نظرى فأحاول أن أستفهم منه : أيه ده ؟!!! فيستدير إلى مغيرا مجرى الحديث متوجها ببصره إلى والدته : أنا نازل بقى يا ماما عشان متأخرش . ثم يوجه حديثه إلى بإبتسامته الحلوة : متمشيش قبل ماجى ، فأجيبه بإبتسام يناسبه : حاضر .
وإذا بى أستيقظ من النوم ، من هؤلاء ؟!!! أين كنت ؟!!! لماذا أنا فرحة هكذا على غير عادتى فى الإستيقاظ ؟!!! لم أعلم أى شئ عن ذلك الحلم الغريب ، فأودعته من بالى جانبا مؤقتا حتى أباشر يومى فأعددت قهوتى الصباحية وشرعت فى متابعة هاتفى فقد كنت كاتبة صحفية فى العديد من الصحف الإلكترونية لدى ميول أدبية ولى صفحة على الفيسبوك أتابع كتاباتى من خلالها ، وهممت بإستياء بمتابعة طلبات الصداقة فلم أكن أنا لأقبل طلبات صداقة أحد لا أعرفه شخصياً محيط علاقاتى محدد وضيق جدا جدا فقد كنت أرفضها جميعا من قبل حتى أن أرى مرسلها طالما لا أعرفه ، فإذا به هو … أنه هو ذلك الذى حلمت به وأنا لا أعرفه !!! كيف ؟!!! هل يعقل هذا ؟!!! فقبلت الطلب على الفور لأعرف من هو ؟!!! كنت مُحجمة جدا فى حديثى مع الجنس الأخر . لم يكن لى الا متابعة أعمالى فحسب فى نطاق الحديث المهنى والألقاب المتبادلة بينى وبين رؤساء تحرير الصحف أو حتى أى صحفى زميل لم تخرج علاقاتى يوما عن إطار الرسميات . ولكن مع ( فارس ) كان الأمر مختلفا . هكذا عرفت أسمه وعرفت كل شئ عنه بسرعة خيالية ، فقد كان شاعرا ، يكتب إيضا فى العديد من المجموعات والصحف ولكنه يهتم بصفحته الشخصية حتى كون تفاعلا وشهرة ملحوظة عليها ، لكننى مع كل شئ كنت أتوجس من أنبهار وأندفاع البدايات فحاولت أن أهدى من روعى ولتسير الأمور على طبيعتها بعيدا عن أى حماقة ، فصرت أتابع كتاباته وأعماله �
( فارس وجواد )
تلك المباشرة فهو غبى وأنا لا أحب الأغبياء أو يفهم ولكنه يتجاهل لأمر يخصه فالموضوع أذن مُنتهى !! لست أنا تلك التى تُنازع أنثى على رجل كائنا من كان ، أنا أمرآه لم تحدث ولن تتكرر . فلا يجوز مقارنتها بآخرى على أى حال من الأحوال . حاولت أن أشغل نفسى بصفحتى وأعمالى متناسيتا آمره . فحادثته فى هذا الشأن أنى أريد أن أكبر صفحتى الشخصية مثله وأن أزيد التفاعل عليها ، فوجدته مرحبا مشيرا إلى بإضافة أؤلئك المتفاعلون عنده وعند غيره وإجتذابهم بالمحتوى الشيق والجدير بالمتابعة ، من ثمة هرولت على تنفيذ كل نصائحه بمنتهى الجِد ، المهارة والنشاط ، فقد كنت متفرغة للعمل الألكترونى لا يشغلنى شئ عنه ، أمتلك الأسلوب الكوميدى اللبق الدمس ، خفة الظل والروح المداعبة المرحة لإكتساب الأصدقاء والمتابعين ، لدى الكثير والكثير جدا من الفطنة والكياسة لأحتواء مختلف وجهات النظر ، عندى قناعات ووجهات نظر مختلفة ، مبتكرة وجديدة ، والأخرون فى وسائل الأتصال بالأخص يهرولون وراء كل جديد من ثمة وفى مدة وجيزة جدا لم تتجاوز عدة أشهر وبعد فضل الله سبحانه وتعالى حققت نتائجا رائعة و تفاعلا ملحوظا جدا . ملفتا لأنظار الجميع ما بين حاسد وناقم وغيور . لكننى لم أكن لأهتم بأحد . فأنا لا أهتم الا بنفسى . أعرف جيدا من أنا ؟!!! وماذا أستحق ؟!!! ولكننى لم أكن أتوقع تغيره هو معى ( فارس ) ماذا حدث ؟!!! لماذا غير أسلوبه هكذا معى من التودد واللطف الى التجاهل ، البرود ، اللامبالة وعدم الإكتراث ؟!!! ماذا فعلت ؟!!! ماذا جنيت ؟!!! ما بالك أنت معلمى وموجهى ولطالما كنت أدين لك بالفضل ما بين الوقت والآخر ؟!!! أى أثم أقترفت ؟!!! فالحديث عن أخلاقى وطريقة تعاملى وحوارى مع الاخرين شئ مفروغ منه وليس مجال حديث أصلا ، فأنا مازلت كما أنا مُحجمة فى كلامى الخاص كل ما حدث هو تودد وتفاعل على العام فلا أحد غيره يعرف عنى أى شئ ، لفت نظرى ذات مرة أنه غيور جدا لا يسمح لأنثاه بإختلاط مطلقا ولكن ما دخلى أنا ؟!!! أنا لست أنثاه ، ولا أعلم حتى على وجهة الدقة ماذا أعنى بالنسبة إليه !!! فالأمر بالنسبة لنا يجب أن يكون مختلف . فأنا رغم جنونى به وبغيرتى عليه أتعامل بسلاسة مع كونه ( نجم ) فنان ولديه معجبات . وعليه هو أيضا أن يثق فى حقيقة أن العالم كله فى كفة ميزان وهو فى الكفة الأخرى وهى الراجحة والمثقلة بما فيها . فدخلت أحادثه اليوم ،
_ مالك ؟!! متغير معايا ليه ؟!!!
_ مفيش .
_ لأ فى دى مش طريقتك معايا .
_ أنت عايزة منى أيه ؟!!!
_ عايزة أتجوزك .
وضحكت خلف الشاشة من تلك القنبلة التى رميته بها ، وجاء سؤاله ليؤكد إحساسى .
_ ده بجد ؟!!!
_ وهى الحاجات دى فيها هزار ؟!!!
مازال تحت تأثير الصدمة يجمع الكلمات من هنا وهناك من هول المفاجأة .
_ يا بنتى أنت متعرفنيش ؟!!! مشوف
( فارس وجواد )
بشئ من الإهتمام وقد كان يعجبنى فى كل شئ ، كل ما فيه جميل ، شعره ، إحساسه المرهف ، صوره وتراكيبه وتعبيراته المبدعة ، عفويته ، مزاحه ومداعبته لأصدقائه ، أسلوبه الكوميدى الساخر ، طريقته فى الإستحواز على حب جميع متابعينه ، أتجاهاته السياسية المعارضة التى تشبهنى كثيرا وكأنه ينطق بأرائى ، كل شئ ، كل شئ فيه جميل حتى حزنه جميل . فقد صرت أتابعه بشغف وجدت نفسى معه فقط واحدة أخرى غير تلك المتحفظة التى كنت أعرفها ، أضحك وأتكلم بعفوية أحبها ، أقول ما يحلو لى ولا أخاف من سوء الظن أو التأويل الخاطئ لحديثى ، من ثمة فقد أحببت نفسى من خلاله ، كل هذا وأنا لم أحاول بعد أن أحادثه بشكل خاص فقد كنت أتحرج كثيرا من هذا الأمر ولكننى مع كل هذا التغير تشجعت وجازفت ودخلت أحادثه على الخاص ويا لها من مجازفة !!! فقد كان شخص لذيذ ، ممتع وجميل للغاية . أزال عنى بعفويته المهذبة وبحسن سجيته أى حرج أو تكلف . ومع كلٍ حاولت أن أبقى هادئة وسائلته
_ أنت عرفتنى منين عشان تبعتلى طلب الصداقة ؟!! فقال مبتسما وقد تآخذ قليلا
_ أنا بعدت ؟!!!
_ أه أنا كنت فكراك حد من قرايبى عشان أنا مش بقبل طلبات من حد معرفوش .
_ لأ أصل أنا بكبر صفحتى الشخصية وببعت طلبات لكل الناس المهتمة بالأدب والشعر ممكن أكون شوفتك بتعلقى ولا حاجة عند حد من أصدقائى الشعراء .
_ أه بس أنت بسم الله مشاء الله عليك شعرك جميل جدا
_ تسلمى يا رب ده بس من ذوقك .
كان ودود ومهذب وعطوف لكنه هكذا مع الكل لم يكن يخصنى بشئ . كيف سأحادثه بما يملئ كيانى ووجدانى نحوه ؟!!! أنه طيلة الوقت فى كتاباته ، مفتقد لشئ ، محتاج لشئ ، ينقصه شئ ، يطلب المساعدة ، وكأننى أنا ما يريد ولا يعلم ولا أدرى أنا كيف أبدء ؟!! صارت العلاقة بيننا أكثر لطفا وتودد فقد كان يعرف جيدا أنى لا أطيل الحديث مع أحد من دونه ، لا أحد يعرف عنى وعن حياتى الشخصية أى شئ مطلقا . ذات ليلة كنت فيها مكتئبة جدا لسبب مبهم كعادتى لكنه قال لى فى لطف وأدب .
_ مالك ؟!! أحكى لو تحبى ؟!!
فوجدت نفسى على غير عادتى _ كمثل دمل الأصبع الذى أنفجر بكلمته _ أسرد عليه تفاصيل قصة حياتى ، بكل مواجعها ، الألامها ، معاناتها ، وسواد لياليها ، كيف ظُلمت ؟!! كيف أضطهدت ؟!!! كيف كنت الضحية لكل من مروا فى حياتى ؟!!! المجتمع ، الناس ، الظروف ... فلم يرد ولكنه كتب على صفحته قصيدة شعرت أنها لى أنها جبره بخاطرى المنكسر حتى أننى من كثرة تأثرى بها كتبت عليها ديوان كامل وعليه إهداء إليه ، فقد كنت بين الوقت والأخر أكتب إليه قصائد مدح ، أعارض قصائد له عساه يفهم ماذا أفعل أكثر من هذا لأعبر له عن عشقى وهُيامى ؟!! لكنه لا يبالى !! أقنعت نفسى أنى الفائزة فى كلتا الأحوال ( فالخيرة دوما لى فيما يختاره الله ) سوء أكان لم يفهم تلميحاتى تلك
( شكرا )
شكرا لأننى خاطرتك . لأنى شاغلة فكرك . شكرا لورعك ، لزهدك ولقلبك . لأنك حاملنى فوق رئسك ، فى أعلى مقام . شكرا على الحب والحرب والسلام . شكرا من الأعماق على القرب على بعدٍ ، على الإحترام . على كلام ليس كالكلام . على وردية الأحلام . على أرواح تنعم بإلإنسجام . على كل إغصان الزيتون . و كل إطواق الحمام . شكرا للحضور . لأطيب وألذ وأغنى شعور . للود المنثور . لموادك تلك الحرة فى كل دستور . شكرا على الحزن الجميل . على أروع اللحظات ، فى العمر البخيل . على الوجد النبيل . شكرا لأنك معى ، بداخلى ، توجهنى وترعانى فى كل سبيل . شكرا لأنك سهل ، بسيط و ميسر . شكرا لأنك على نسق فريد غير مكرر . لأنك على استحواز كل الحب كنت الاقدر والأمهر . شكرا لأنك جئت كما أتصور . شكرا على الإيمان . شكرا على الأحتضان . على الإطمئنان . على الإحسان . على حل كل العقد دون جهد أو برهان . شكرا لأنك أجمل ، أرق وأحن إنسان . شكرا لأنك القلم الأبيض فى علبة الألوان . لا يجيد سواه الرسم على الصفحات السوداء . شكرا على البكاء والغناء . على الإصغاء . على أحن داء وألذ دواء . شكرا على الشُح والسخاء . شكرا لأحوالك كلها على السواء . على أعظم وأتفة الأشياء . شكرا على ما كان وشكرا على ما لم يكن . على الإبتلاءات والظروف والمحن . على السكن . شكرا على المحجوب . لأنك صابر كما أيوب . لأنك مؤمن ومؤقن بالمكتوب . لأنك فى نفسك يوسف . لأننى بعينيك وقلبك يعقوب . شكرا على كل الحوادث والظروف والخطوب . على أنك حر لا غالب ولا مغلوب . شكرا لأننى لك فكر ، حس وأسلوب . شكرا لأنا الدعاء كما أنا الكروب . شكرا لأنا سكر نذوب . شكرا لأنى أمك ووطنك . لأنى دائما نصب عينك . شكرا لأنى عاشقتك . شكرا لأنك ……
#سمر_إسماعيل
( لست وحدك )
عايز أسيب أيديها بس أنا مش قادر . بعبد فيها حرمانها الكافر . بعقل بيرفق ولا بيجاذف ولا بيغامر . عمره ما داق الخمرة ولا كان بيقامر . ولا غاوى يمشى فى سكتها على شوك ومخاطر . بس ده مكتوب . لقا وفراق على القدر محسوب . حبيت فيها الشيئ النادر . طفلة بريئة بطموح فاجر . بتواجهة حرب من غير ساتر . شهيدة عشق الكظم الساهر . أنا موجة بترفع روح غرقانة بتعافر . جواها ياما حروب وحروب . عينيها بالسلام بتبادر . وغلاوتك عندى صعبانة عليا بجد . تايهة ، وحيدة وملهاش حد . ملهاش حد يطيب روحها . ملهاش حد يداوى جروحها . ملهاش حد تاويله فى عز البرد . ملهاش حد يحاول يسقى _ فى عيونها _ الورد . أنا مش صياد . أنا عالم بيضج _ من غيرها _ سواد . عاشق وأتعود فى حياته الزهد . أنا عارف أزاى كنتوا انتوا لبعض ؟!! أنا مش دجال . ولا عايز منها لا شهوة ولا عيال . أنا واحد بيطبطب على روحها الماشية برمية نرد . من غير ما تعرض بجموحها . ولا تزايد بيها وبشعورها . ولا تقول أنى مش مالى عينها . أنا مؤمن بيها وباخلاصها. عارف أنت ايه وأنا ايه بالنسبة لها . أنا مش خّيالها . أنا عضض بيشد على أيدها . بيدعمها ، بيقويها وبيسندها . عارف والله كل اللى قولته وهتقوله . سهران ليلها . عينى مبتغفلش بطوله . حاسس بألامها اللى ساكنها . حاسس بيك كونك حايل دايما بينى وبينها . حاسس بوجعها . حاسس بفشلها فى مرجوعها . أبقى أنا بتكلم ومفيش غيرك قدامها . بتبقى معايا وفى حضنى وبتبقى معاك فى أحلامها . بس أنا عمرى مهقدر أبعد عنها . بجلد نفسى بعشقى أنا ليها وعشقها ليك . بجلد نفسى بسهرى فى ليلها وهى فى لياليك . بجلد نفسى بجبروتها وبالعجز اللى ماليك . كان عندك حق . ملعونة الدنيا دى بنت الكلب . مبنختارش مين فيها نحب . ولا مين يسكن منا فى شغاف القلب . بس ربنا بيحب الاحسان . و المحسنين . جعل العطف فى قلوبنا عمار . والرحمة دى دين . أنا بعشقها بكل ما فيها . بالبؤس ، الحزن والقهر اللى ماليها . أنا مش ممكن عنها أتخلى . أنا عايش ليها . هى صلاة أنا فيها الفاتحة . هى الدعوة وأنا ليها آمين . أنا أنسان . خلينى أقول وأنت كمان . بس تخيل لو لينا فيها نصيب فى الجنة … ربنا هيسيرها لمين ؟!!!
#سمر_إسماعيل
( فارس وجواد )
مشوفتنيش ؟!!! مكلمتكيش صوت حتى ؟!!! أزاى ده يعنى ؟!!!
_ يا حبيبى أحنا مخلوقين لبعض ومكتوبين لبعض من قبل منتولد بس كله بإذنه ، الأمر كان موقوف على اللقا بس ، لو طاوعت قلبك هتلاقينى جواك زى ما أنت جوايا ، كنت بتحلم بيا من زمن ، فيا كل حاجة عشت بتتمناها ، المودة والرحمة اللى ربنا جعلهم بين الأزواج أكبر وأعمق بكتير من الشوف والسمع ده لقى أرواح ( وكل لقاء لا يسمو إلى الروح فراق ) الأمام جلال الدين الرومى أنا عارفة بتحب الصوفيين أنت صح ؟؟ شوفت بقى ؟!!!
_ ؟؟؟؟؟؟؟؟؟؟؟؟؟
_ قولت ايه بقى ؟!!!
_ مش عارف أقولك ايه ؟!!!
_ متقولش … السكوت علامة أن اللى هيتقال أقوى بكتير من الكلام … نقرا الفاتحة ؟؟؟
#سمر_إسماعيل
( نهايتى معاك )
آخرتها فى العلاقة . بموت بكل بساطة . طفلة دابت فيك زى حته الشيكولاتة . برجع لكل شات كان بينا . بقارن وصلنا لأيه ؟!! أزاى كنا ؟!!! أزاى أستخسرنا حنانا فى روحنا ؟!!! أزاى كان بإيدينا نداوى جروحنا ؟!!! فاكر كلامنا وضحكنا مع بعض ؟!!! كنت بقولك كل كلام عمرى فى يوم ما قولته لحد . كنا بنضحك بس بنضحك من القلب بجد . ليه أخترت البعد ؟!!! ليه الكفر وليه العند ؟!!! كنت قاعدة مربعة فى محرابك بتعلم . كنت بغمض عينى وأسيب روحى معاك تتكلم . عمرى ما تخيلت أنى بيك أنت أتألم . أفتكرت عيون كات بتزغلل من صورتك حتى فى تاج ، وصوابع بكلمها معاك كات بتنور . دمرنى حبك بطريقة أبشع مما كنت أتصور . مصدومة وموجوعة مش قادرة أفكر . أزاى وليه تتغير ؟!!! مش أنا الطيبة ؟!!! بنت الأصول ، العشرية ؟!!! عملت ايه أسأت ظنك فيا ؟!!! مش ذنبى انى أتعاملت معاك بحسن نية ؟!!! ده ذنب الندل قلبى . ولا بيعرف يدارى ولا بيقدر يخبى . كان سابنى فى همى وغلبى . مكونتش حمل انه بيك يعذبنى . كنت بفرح بخوفك وغيرتك عليا . كنت بحس أنى قومت بعمل بطولى لما تضحك بسببى . كنت أنت تنده فى التو واللحظة بلبى . من غير ما أقولك أو تقولى ، كنت حساها وحسسها أنك أنت أبن قلبى . كنت مطمنة أنك جمبى . دايما شايفنى وسامعنى . كنت حاسة بيك حاسسنى . قلبى بيرقص من سعادته لما تقولى أنك عايزنى . مش عارفة ليه بتحرمنى من أحساسى بيك ؟!!! دنا كنت راضية بس أفضل بين أيديك . دنا كنت عايزك تتمنى وأنا أقولك : شبيك لبيك . مش عارفة ليه بتأذينى فيك ؟!!!! رغم جحودك ونكرانك حسيت أنى صعبانة عليك . عشت نهايات مؤسفة كتير وحياتى عندك متكررها . حاول تكسب نفسك بيا ، صدقنى مش عيزاك تخسرها . قدر بس إحتياج أنثى شيفاك أنت مصيرها . أنا طاقة عشق وحياة حبك تستثمرها . متخافش عليا معنديش غيرك حاجة أخسرها .
#سمر_إسماعيل
الشاعرة فى سطور … _ سمر إسماعيل الدسوقى ، مواليد 17 من حزيران لعام 1990 . _ ولدت فى المنصورة ، محافظة الدقهلية لوالد أزهرى ووالدة ربة منزل كان لهما أبلغ الاثر فى نشأتها المحافظة وشغفها باللغة والأدب فى صغر . _ تخرجت من ليسانس اللغة العربية كلية الأداب ، حيث ساهمت كليتى فى بناء شخصيتى الأدبية بكل ما أغرمت به فيها ، من أساتذتها و طلابها وكتبها وجدرانها و … و … وصفو البال وطيب النفس ذلك الذى نعمت به فيها . _ أحببت شعراء العربية كلهم ممن كتبوا على عمود الشعر ، فأغرمت بأمرؤ القيس وتيمنى المتنبى ، أثرنى البحتريين ، بحترى المشرق وبحترى المغرب " ابن زيدون " ، أبحرت كثيراً فى أشعار الصوفية ، فعشقت " شهيدة العشق الألهى " رابعة العدوية ، أبى منصور الحلاج ، محى الدين بن عربى ، ولم عرفت أمير الشعراء " أحمد شوقى " طبعت على جبينه قبلة أحترام وتقدير ، الى أن شغف القلب منى " الطائر الجريح " أبراهيم ناجى ، فهذب أسلوبى بنبل عاطفته وسمو معانيه ورقة وعذوبة ألفاظه . _ نميت موهبتى بالعديد من دور الأدب فى الكلية والجامعة وقصور الثقافة بالمحافظة . _ على الصعيد السياسى : فى 2010 أنضممت للحزب الناصرى ، الذى أعتنقت مبادئه وأمنت بها عن ظهر قلب ، راودنى كما راود أبناء جيلى " حلم الأشتراكية " و " عيش _ حرية _ عدالة أجتماعية " فقومنا بالثورة البيضاء فى الخامس والعشرين من يناير لعام 2011 وكانت من أجمل وأزهى فترات الأنتماء والوحدة الوطنية فى تاريخى وتاريخ الأمه لكن " ليس كل ما يتمناه المرء يدركه : تأتى الرياح بما لا تشتهى السفن " . _ على الصعيد المهنى : عملت لفترة كصحفية بجريدة شروق العالم لصاحبتها الاستاذة : نفين الديب ما بين 2012 ، 2013 _ لى العديد من القصص بخلاف موهبتى الشعرية ، " المفترق " و " الدمية " و " هى الأيام " لكنها لم تنشر بعد . _ لى عمل مسرحى بعنوان " غريب " لكنه لم ينشر أيضا . _ أتجهت منذ فترة وجيزة لكتابة عدد من الأعمال بالعامية المصرية متأثرة بشاعرية " هاويس الشعر العربى " هشام الجخ ورصانة وحكمة " محمد أبراهيم " وصدق وإحساس شاعرى الحبيب " عمرو حسن " . _ لى العديد من المشاركات فى " اليوم السابع " _ أكتب ايضا بشكل منتظم وثابت فى العديد من الصحف الالكترونية على ال Face Book جريدة حكاية وطن _ جريدة شروق العالم و البيان بوست والصحبة نيوز _ لى عدد أربعة دواوين الكترونية الا وهى ( أحاديث سمر _ شكرا _ فراشة الحروف _ رباعيات هى ) و مجموعة خواطر بعنوان :( شئ من العشق ) يسعدنى أيضا تواصلكم معى على 👇 Smr Dsoke ، bage " هى الأيام " على Face _ Smreldsoke@instgram _ كما يسعدنى ايضا متابعتكم قناتى المتواضعة سمر الدسوقى على Youtube _ ومتابعة مدونتى الشخصية " Ahadess samar "
ليست هناك تعليقات:
إرسال تعليق