كلنا من طين مخلوقين
من نيلها وبترابها معجونين
وآخرتها متر بمتر مش مترين
لكننا وعمرنا ما كنا واحد
منا البشر وفي منا الشياطين
منا البشر وفي منا الشياطين
ــــــــــــــــــــــــ
في ناس أبداً مش مننا
دمهم عمره ما كان دمنا
هما السادة بزيادة
وإحنا العبيد كالعادة
كلامنا واحد ولكننا متقسمين
كلامنا واحد ولكننا متقسمين
ــــــــــــــــــــــــــ
هما أصحاب البرج العالي
سعادة الباشا وصاحب المعالي
وإحنا الفقرا ولاد الفقرا
هم وغم لسيدنا الوالي
عايشين بحماه وياريت ساكتين
عايشين بحماه وياريت ساكتين
ــــــــــــــــــــــــــ
أغلى ما فينا دمه رخيص
ملهوش ديه بعرف خسيس
ولو ع الموت ما كله هبموت
متفرقش غرقان ولا بإيد هلفوت
أو كمسري جبان بلا ذمة ودين
أو كمسري جبان بلا ذمة ودين
ــــــــــــــــــــــــــ
نفسي أبكي بس الدموع متعثرة
حتى العيون متكتفة ومتجنزرة
ماتوا الولاد بعجزهم بغلبهم
بصرخة مكتومة وحلم بقلبهم
ماتوا مع إنهم بالأساس ميتين
ماتوا مع إنهم بالأساس ميتين
ــــــــــــــــــــــــــ
شفت الصراخ والوشوش متعفرة
دول شهدا الحدود ماتوا بمجزرة
وده محمود البنا شهيد المنظرة
كل القلوب حزينة ومتكدرة
والحزن ساكن ومعشش بالوتين
والحزن ساكن ومعشش بالوتين
ــــــــــــــــــــــــــ
ماتت صرختي واقفة بالحنجرة
جرى ايه يا بلد فين المرجلة
فين الشهامة وقت المقدرة
إذاي يكون عندنا شهيد للتذكرة
تمن حياته من الجنيهات سبعين
تمن حياته من الجنيهات سبعين
أيمن موسى
ليست هناك تعليقات:
إرسال تعليق