أصول الهبد الأدبي .. بسمة الخولي

علشان تبقى ذكي ومتتغفلش ، ومحدش يضحك عليك و يقولك تعال اوريك الرواية اللي بتنور في الضلمة و تلاقي نفسك بتدفع فلوس في الولا حاجة :D ..
لو انت قارئ ، أو كاتب ، أو ناوي تبقى اي حاجة من الاتنين، أو مش ناوي بس تعرف حد في فئة من الاتنين . في كام قاعدة كدة ركز فيهم ، وياريت لو استفدت شير مع غيرك يعني :D ..
البوست طويل سيكا، بس مهم جدًاااا ..
1 - #الأدب كله من يوم ما خلقه ربنا ، منقسم لحاجة من اتنين fiction و non-fiction أو لامؤاخذة خيالي وواقعي . الواقعي ده اللي فيه الكتب اللي بتتكلم عن حوادث حقيقية ، قصة حياة شخصية مشهورة، كتب التنمية البشرية .. الخ .
#الروايات بكل انواعها و اشكالها بقى تبع الـfiction .. حلو يا عم ؟! .
الحاجات الفيكشن دي بتتحط تحت 3 فئات ( ادب اطفال - ادب مراهقين - أدب خاص بالبالغين ) .
#ادب_الأطفال معروف ، حاجات المكتبة الخضراء، صرخة الرعب، سيبتموس هيب ..الخ .
#ادب_المراهقين بإختصار اي حاجة بطلها/ بطلتها من 14 - 25 سنة ، عندهم شوية هرمونات ناقحة عليهم و بيتدخلوا في اي حاجة وكل حاجة، أو الشخص اللي بيحكي كبير في السن بس الكلام موجهة للفئة بتاعت 14/25 دي :D . توايلايت مثال، مباريات الجوع، هاري بوتر، فامباير دياريز، ماوراء الطبيعة علفكرة منها .. الخ .
#أدب_البالغين اي حاجة تانية، وبيبقى اعمق من أدب المراهقين .

2- انت ككائن حي حر تقرأ في الفئة اللي عاوزها و محدش له عندك حاجة، بس لما تيجي تتناقش مع حد خليك عارف انت قارئ في انهو فئة علشان محدش يضحك عليك . يعني لو جيت قلت مثلًا " #ثلاثية_غرناطة " مملة وطويلة و " اكتشفت زوجي في البريبئ اللي هناك ده " واو .. يبقى انت بتهبد :D ، متحطش أدب المراهقين وأدب البالغين في نفس المقارنة .. ركز .

3 - لو ناوي تبقى كاتب ، مينفعش تقرأ #ادب_مراهقين بس ، حتى لو 500 رواية.. اسلوبك هيبقى واقع تمامًا وروايتك هتبقى مسطحة . ادب المراهقين جميل جدًا بس مينفعش يبقى Base لحاجة .

4 - الرعب مش #جن بس :D ، في رعب معوي ، رعب نفسي ، رعب أمراض ، رعب دوميستيك ( حاجات بتحصل في البيت و الاسرة ) ، رعب فضاء ، رعب نهاية عالم ، رعب وساوس ، رعب جريمة .. الخ .

5 - شكلك ، دينك ، جنسك ، طريقة لبسك ؛ دي حاجات ملهاش اي علاقة بكونك قارئ أو كاتب كويس أو وحش . وفورمة الساحل و الفساتين القصيرة دي مش بتزود الوحي دي بتجيب سبوبة بس :D ..

6 - #جوودريدز مش موقع تحميل كتب ، انت بتعرف منه شكل الكتاب و الكاتب و باقي اعمال الكاتب و ترشيحات مشابهة للحاجات اللي انت بتقراها و بتابع منه انت قريت كام كتاب وكدة .. وجوودريدز الوطن العربي غير موثوق في ريفيوهاته  وتقييمات كتبه علشان في ناس بتدخل تطبل ، وناس بتدخل تنفسن ، وناس بتدخل بأكونتات فيك تبوظ التقييمات من باب الفضا ومن قبل ما الكتاب ينزل اساسا .. فا هتلبس :D .

7 - #قراءة_الانجلش سهلة مش صعبة ، ابدأ بس بروايات عالمية مترجمة من اللي صفحة عربي و صفحة انجلش أو اسمع اوديو ، و اصبر على نفسك .. هتتطور و بسرعة جدًا .

8 - مفيش حاجة اسمها #روايات_عامية ، انت ممكن تكتب بوست بالعامية ، سكريبت قصة اذاعي أو حلقة يوتيوب بالعامية .. لكن رواية لا ، انت كدة عامل زي الناس اللي كانت بتجمع النكت في كتب و تبيعها على فرشة الجرايد زمان ، حاجة ملهاش اي قيمة من اي نوع :D .

9 - لما تقرر تنزل #ورشة_كتابة لحد ، دور على اعماله و اقراها الاول كلها .. اه كلها مبهزرش !! ، أو عالأقل اول و اخر عمل وشوف هل الشخص ده اتطور فعلًا بما يكفي انه يساعدك ؟ ، ولا بيعمل مصلحة على قفاك ..

10 - مفيش حاجة اسمها #امهات_الكتب ، علشان امهاتك غير امهاتي :D ، واللون اللي انت بتحبه و شايف في كتب فيه مهمة ممكن مكونش بقراه اساسًا ولا يعني ليا اي بتنجان خالص ..

11 - الكتب مش اهم من الروايات ولا الروايات اهم من الكتب ، الأهم هو #موضوع اللي بتقراه . علشان رواية عشوائية تمامًا زي " رحلة بالداسار " مثلًا ممكن تعرفك تاريخ وبلاد في حين ان الكتاب ممكن يكون عن " 5 طرق علمية لإعادة تدوير البربور . " فا مش شرط خالص ..

12 - #الادب_الرومانسي و النحنحة و العياط و المحن الأدبي مش هيوديك في حتة ، هيفرغلك شوية طاقة نفسية بس لو قعدت تقراه كتير الIQ بتاعك هيقل اسمع مني ..

13 - مش بكترة الكتب ياخويا ، مش بكترتها يا حبيبي ، انا بجمعها علشان بحبها اه لكن ملهوش علاقة بإنك تبان مثقف !! ..

14 - مش معنى انك ممثل / مغني / مذيع / رياضي شاطر ومحبوب وعظيم في مجالك ، انك بالضرورة هتبقى #كاتب شاطر . دي موهبة ، وبيبان مين واخدها مصلحة من مين فعلًا موهوب ..

15 - كل كاتب له الحلو و الوحش ، فمتقدسش حد .. كلنا عندنا نقط ضعف ولو حاجة مش عاجباك في #رواية لحد بتحبه قولها بصراحة .

16 - انتخريستوس مش مرجع علمي ولا تاريخي و ما هو الا شوية قصص معروفة محطوطة في حبكة روائية مسلية و خلاص .. واجاثا كريستي مش رعب ، مش هنهزر احنا :D .

17 - الخيال العلمي ، غير الفانتازي ، غير الرعب، غير الجريمة ..

واخيرًا القهوة مش المشروب الرسمي للقراءة ، ممكن تشرب موز بلبن وممكن تاكل سندوتش لانشون و انت بتقرأ عادي و الله محدش هيقل منك ، القهوة بتزود التركيز بس :D ..
بسمة الخولي
من صفحتها على الفيس بوك